2 Samuël 02
01Dou vruig David aan de HEER: "Zel ik mor noar ain van steden van Juda goan?" "Joa," zee de HEER. "Noar welkent?" vruig David. "Hebron," zee de HEER.
02Dou ging David noar Hebron tou, mit zien baaide vraauwen: Achinoäm oet Jizreël, en Abigaïl dij eerder traauwd west haar mit Nabal oet Karmel.
03Hai nam ook zien manschoppen mit, elk mit zien hoesholden. Dij gingen wonen in steden om Hebron tou.
04Dou kwammen manlu van Juda noar Hebron en stelden David doar aan as keunenk van stam Juda. Dou David vernam dat t volk van Jabes in Gilead Saul begroaven haar,
05stuurde hai doar n poar van zien manlu hèn mit bosschop: "De HEER mag joe zien zegen geven veur joen traauw, dat ie Saul, joen keunenk, begroaven hebben.
06Doarveur mag de HEER joe aal joen levensdoagen goudgunsteg wezen. Ik zel nooit vergeten wat ie doan hebben.
07Loat kop mor nait hangen, ook al is Saul, joen keunenk, der nait meer. Judeeërs hebben mie as keunenk van heur stam aansteld, t is mor dat ie t waiten."
08Mor Abner, zeun van Ner, generoal van Saul zien leger, nam Saul zien zeun Isboset mit Jordaan over, noar Machanaïm.
09Doar muik hai Isboset keunenk van Gilead, Aser, Jizreël, Efraïm en Benjamin, zo te reken van hail Israël.
10 Isboset was vatteg joar dou hai keunenk van Israël wer. Hai het twij joar regaaierd. Juda was ainegste stam dij achter David ston.
11 David haar dou zeuvenenhaalf joar keunenk west van Juda, in Hebron.
12 Abner ging mit Isboset zien manschoppen van Machanaïm noar Gibeon.
13 Ook Joäb, zien moeke haitte Seruja, ging doar noar tou, oet Hebron vandoan, mit troepen van David. Baaide legers kwammen nkander tegen bie viever van Gibeon. Doar huilen ze ho, elk aan n kaant van viever.
14 Abner zee tegen Joäb: "Loat kampvechters t toch oetvechten!" "Akkoord," zee Joäb.
15 Dou werden der twij koppels aanwezen: twaalf oet Benjamin veur Isboset, en twaalf van David zien manschoppen. Dij kwammen noar veuren.
16 Elk greep zien tegenstander bie kop en stook zien sweerd in aander zien zied. Van dij gevolgen dat ze aalmoal tougelieks dood deelvuilen. Zo kreeg dit stee bie Gibeon noam Chelkat-Hassurim.
17 Dou brook hel lös. Abner en manschoppen van Israël werden versloagen deur David zien soldoaten.
18 Seruja heur drij zeuns, Joäb, Abisai en Asaël, vochten ook mit. Asaël kon zo haard lopen as n hert in t open veld.
19 Dij begunde achter Abner aan te joagen en zat hom stoef op hakken.
20 Abner keek achterom en zee: "Bistoe dat Asaël?" "Joa wis!" zee dij.
21 "Zit toch nait laanger achter mie heer," zee Abner, "kinst beter achter n aander aan goan en dij zien woapens pakken." Mor Asaël wol van gain wieken waiten.
22 Abner woarschaauwde hom nog n moal: "Vot doe! Aans mout ik die doodmoaken; mor hou kin k dien bruier Joäb den onder ogen kommen?"
23 Mor Asaël zette deur. Dou roamde Abner mit zien speer achteroet en ruik hom zo haard onder in t lief dat speer der achter weer oet kwam. Asaël plofte deel, morsdood! Elk dij der langs kwam bleef stilstoan bie zien liek.
24 Mor Joäb en Abisai gingen Abner achternoa. Tegen twijduustern kwammen ze bie heuvel Amma, oostelk van Giach, kaant op van woestijn van Gibeon.
25 Benjaminieten verzoamelden zok weer bie Abner en stelden heur op bovenop n heuvel.
26 Dou raip Abner noar Joäb: "Wordt t gain tied dat wie opholden mit mekoar òf te slachten? Doe waist toch wel dat ter op t èn aans niks overblift as hoat, hoat en nog ais hoat! Wie binnen ja ain volk. Geef dien manschoppen toch odders dat ze votdoalek oetschaaiden mit heur bruiers achternoa te zitten."
27 "Zo woar as God leeft," zee Joäb, "goud dast zegst, want aans haren mien troepen nooit eerder as mörgenvroug t achtervolgen van heur bruiers stopzet."
28 Dou gaf Joäb odder op bezuun te bloazen. Aal zien manschoppen bleven stoan. Zai achtervolgden d'Isrelieten nait laanger. t Vechten was doan.
29 Dij haile naacht raaisden Abner en zien manschoppen deur t zudelke Jordaandaal, dou Jordaan over en deur t haile Bitrondaal. Zo kwammen ze weer in Machanaïm.
30 Joäb zat nait laanger achter Abners leger heer. Hai verzoamelde zien haile leger, en dou ontbraken der, behaalve Asaël, negentien man van David op t appèl.
31 Mor van Benjaminieten wazzen drijhonderdsesteg man om haals brocht deur David zien soldoaten.
32 Joäb en zien manlu nammen t liek van Asaël mit en begruiven t in Betlehem in t graf van zien voader. Dou ze dat doan haren, raaisden ze haile naacht wieder en kwammen bie lichten in Hebron aan.
|
